والمفروض استني وقت قد إيه بعد ما شلته قبل محاولة الحمل ؟
اللولب الهرموني ممكن يتشال في أي وقت عند الدكتور وممكن تحملي بعد ما تشيليه على طول.
هل استخدام حبوب منع الحمل فترة طويلة ممكن يأثر على خصوبتي بعد كده؟
لا، استخدام حبوب منع الحمل مش بيأثر على خصوبتك على المدى البعيد، وممكن تحملي بمجرد ما توقفي استخدام حبوب منع الحمل عشان كدا تقدري تاخدي الوسيلة المناسبة ليكي المدة اللي إنتِ عايزاها.
هل نتيجة اختبار الحمل مؤكدة لو بستخدم حبوب منع الحمل؟
دايماً بننصح إنك تعملي اختبار الحمل لو في شك إنك حامل، بغض النظر عن الوسيلة اللي بتستخدميها لأن اختبار الحمل بيتفاعل مع هرمون الحمل(HCG) فقط.
متي اعمل اختبار الحمل عشان اتأكد إذا كنت حامل أو لا؟
هرمون الحمل بيظهر في البول أو الدم بعد 13 إلى 16يوم من خروج البويضة وهو الوقت اللي بيكون ميعاد الدورة الشهرية قرب فيه.
لكن تحليل الدم بيكون أدق لأنه ممكن يكتشف كمية أقل من هرمون الحمل HCG عن تحليل البول ودا معناه إنك ممكن تعرفي إذا كان في حمل بدري أكتر ، عادة ما بين 6 إلى 8 أيام بعد التبويض لو عملتي نحليل دم.
هو اللولب الهرموني ممكن يتحرك ويسبب مشاكل؟
يعتبر اللولب الهرموني وسيلة فعالة بيركبها الدكتور وبتفضل في مكانها مدة 3 أو 5 سنوات وخطر حدوث ثقب في الرحم نادر تقريبا أقل من واحد في الألف.
لازم استخدم وسيلة لمنع الحمل بعد الولادة؟
ممكن يحصل حمل بعد الولادة بوقت قصير جداً لو ما استخدمتيش وسيلة لمنع الحمل.
معظم الدكاترة بينصحوا بتأجيل الحمل لمدة 18 شهر على الأقل بين كل طفل والتاني.
لو برَضع طبيعي لازم استخدم وسيلة لمنع الحمل؟
التبويض ممكن يتأخر مع الرضاعة الطبيعية، بس عادة بيرجع بعد حوالي 6 شهور من الولادة ووقتها ممكن يحصل حمل. بالنسبة لمعظم السيدات التبويض بيكون قبل بدء الدورة الشهرية بأسبوعين ودا معناه إنك ممكن تحملي حتي لو الدورة الشهرية مش عندك.
ممكن يحصل حمل في فترة الدورة الشهرية؟
فعلا ممكن يحصل حمل في فترة الدورة الشهرية.
لأن الحيوانات المنوية ممكن تفضل داخل الرحم لمدة تصل إلى7 أيام في بعض مراحل الدورة، علشان كده لازم تلتزمي بالوسيلة لو مش عايزة تحملي.
هل وسائل منع الحمل الطارئة فعالة؟
في نوعين من وسائل منع الحمل الطارئة:
• اللولب النحاسي داخل الرحم (اللولب) ، أو اللولب.
• حبوب منع الحمل الطارئة ، أو حبة الصباح التالي اللي بتتاخد تاني يوم بعد العلاقة.
الطريقتين نتيجتهم فعالة في منع الحمل لو استخدمتيهم بعد العلاقة بوقت قصير.
استخدام اللولب النحاسي أفضل للسيدات اللي بيحتاجوا وسائل منع الحمل الطارئة (لو مناسب بالنسبة لهم أو استخدامه مقبول) لأنه الوسيلة الأكثر فاعلية لمنع الحمل الطارئ.
ممكن أخذ حبوب منع الحمل لو أنا مصابة بسرطان الثدي؟
مهم جدًا تبقي عارفة إنك لو اتشخصتي بسرطان الثدي، مش المفروض تستخدمي وسائل منع حمل هرمونية لأن فيه دراسات بتقول إن موانع الحمل الهرمونية ممكن تزود فرصة رجوع السرطان.
هي حبوب منع الحمل بتزود فرصة الإصابة بالسرطان؟
حبوب منع الحمل بتحمي من نوعين من السرطان (سرطان بطانة الرحم وسرطان المبيض) ولكن ممكن تزود خطر الإصابة بسرطان الثدي بشكل بسيط.
استشيري الدكتور لو بتفكري تستخدمي حبوب منع الحمل عشان تحددي المناسب لحالتك.
الحبوب المركبة ممكن تسبب الحمل في توأم بعد ما ابطلها؟
مفيش علاقة بين استخدام الحبوب وإنك تحملي في توأم.
ممكن استخدم وسيلة لمنع الحمل بعد الولادة القيصرية ؟
استخدام وسائل منع الحمل داخل الرحم أفضل للسيدات بعد الولادة القيصرية أكثر من الولادة الطبيعية.
وكمان اللولب مفيش ليه تأثير على الرضاعة وتركيبه عند السيدات المرضعات بيكون أقل في الألم.
هل المضادات الحيوية بتأثر على مفعول حبوب منع الحمل؟
المضاد الحيوي الوحيد اللي ثبت أنه بيقلل من فعالية حبوب منع الحمل هو الريفامبين عشان كدا لازم التفكير في طريقة تانية لمنع الحمل غير الحبوب وضروري المريضة تكون عارفة إن في احتمالية للتفاعل.
إيه أنسب وسيلة لمنع الحمل بعد سن الأربعين؟
المشاكل الصحية اللي ممكن تحصل بسبب الحمل غير المقصود بتكون نسبتها أعلي في السيدات الأكبر سناً عشان كدا لازم تستخدم وسيلة منع الحمل الأكثر فاعلية.
منظمة الصحة العالمية (WHO) تصنف اللولب النحاسي واللولب الرحمي بالبروجستين وغرسات البروجستين والتعقيم على أنها الطرق الأكثر فاعلية.
هل حبوب منع الحمل ليها مميزات؟
* بتمنع الحمل بنسبة 99% لو استخدمتيها بطريقة صح وبانتظام
* بتحمي من أورام بطانة الرحم والمبيض والقولون
* بتقلل من كمية دم الدورة الشهرية (دم الحيض)
* بتقلل من الآلام اللي بتحصل مع الدورة الشهرية
* بتقلل من خطر الإصابة بالأورام الليفية وتكيسات المبيض وأمراض الثدي غير السرطانية
إيه أضرار حبوب منع الحمل المركبة؟
ممكن يحصل بعض الأعراض الجانبية المؤقتة في أول الاستخدام وبتختفي في خلال كام شهر زي:
* الصداع والغثيان وألم الثدي، تقلب المزاج
* حدوث نزيف أو نزول قطرات دم في غير أوقات الدورة
* ارتفاع في ضغط الدم
لو الأعراض دي مختفتش في خلال كام شهر من الأفضل إنك تستشيري الدكتور وتغيري نوع الحبوب اللي بتستخدميها
حبوب منع الحمل ممكن تسبب تشوهات للجنين؟
حبوب منع الحمل مش بتعمل تشوهات للجنين وملهاش أي أثر على صحتك لو حصل حمل وأنتِ بتاخديها أو استخدمتيها في الشهور اللي قبل الحمل.
هل حبوب منع الحمل بتعمل هشاشة العظام؟
استعمال الحبوب ملوش أي تأثير على كثافة العظام، ومش بيعمل هشاشة العظام، باستثناء حقنة البروجستين فقط حيث إنها بتفقد السيدات بعض كثافة العظام أثناء استخدامها
دا بيحصل للبالغين والمراهقين بيحصل فقد في كثافة العظام ما بين 5-7% في الورك والعمود الفقري.
هل في فايدة لوقف حبوب منع الحمل كام شهر قبل محاولة الحمل؟
الحمل بعد ما توقفي حبوب منع الحمل مباشرة ملوش أي تأثير على الجنين ومش بيزود خطر حدوث إجهاض لأن الهرمونات الموجودة في حبوب منع الحمل مش بتفضل موجودة في جسمك.
هل نتيجة اختبار الحمل بتكون دقيقة لو بستخدم حبوب منع الحمل؟
اختبار الحمل نتيجته دقيقة حتي لو بتستخدمي حبوب منع الحمل لأنه بيقيس هرمون الحمل فقط (HCG) سواء في الدم أو البول.
المواد الفعالة في حبوب منع الحمل ملهاش تأثير على قياس اختبار الحمل لمستوي هرمون الحمل (HCG) في جسمك.
حبوب منع الحمل ممكن تزود وزني؟
مفيش دراسات علمية أثبتت إن حبوب منع الحمل بتأثر على وزن الجسم على المدى الطويل، بس ممكن بعض السيدات تلاحظ تغيرات بسيطة في وزنها لما تبتدي تاخد حبوب منع الحمل، بسبب إن جسمها بيحتفظ بسوائل زيادة.
هل جسمي محتاج فترة راحة من حبوب منع الحمل؟
لا، مش لازم تاخدي "استراحة من حبوب منع الحمل" إلا لو عايزة تحملي. غير كده تقدري تستمري على الطريقة اللي اخترتيها لمنع الحمل طول المدة المناسبة ليكي لأن الخصوبة بترجع لطبيعتها مجرد ما توقفي حبوب منع الحمل.
LET’S TALK ABOUT IT
Happy Birthday, Dear Condom!
What do a hot cook top and a condom have in common? Check it out.
Following the fun
Five sexually transmitted infections (STIs) you should know.
Let kisses fly around the globe:
Fun facts about international ways of kissing on World Kissing Day!
بدعم من
اتحاد شركاء دوليين مهتمين بالصحة الجنسية والإنجابية
