إزاي اللولب الهرموني بيشتغل؟
اللولب الهرموني هو جهاز صغير ومرن على شكل حرف "T" وفيه خزان جواه هرمون البروجستين، وهو بيتركب جوا الرحم والدكتور هو اللي بيركبه. اللولب الهرموني بيقوم بوظيفته عن طريق إنه بيفرز جرعة صغيرة من البروجستين باستمرار في الرحم. وده بيزود سُمك الطبقة المخاطية الموجودة في عنق الرحم، فبيصعب على الحيوانات المنوية إنها تتحرك بحرية وتوصل للبويضة، ده غير إنه بيخلي بطانة الرحم رقيقة.1
الوسيلة دي فعاليتها بتوصل ٩٩,٨٪2
وممكن تستخدمها السيدات اللي مش عارفة تستخدم وسائل منع الحمل زي حبوب منع الحمل (المركبة)، مثلًا، الستات اللي بتعاني من الصداع النصفي.1
كيفية الاستخدام
اللولب الهرموني ممكن يتركب في أي وقت في الشهر طالما مش حامل عشان تنظيم النسل.1
لو ركبتيه في الأيام السبعة الأولى من الدورة الشهرية، هتبقي محمية من إنك تحملي فورًا. لو ركبتي اللولب في أي وقت تاني، استخدمي وسيلة إضافية لمنع الحمل زي الواقي الذكري لمدة ٧ أيام بعد التركيب.1
قبل تركيب اللولب الهرموني، الدكتور هيعمل فحص للمهبل من جوا عشان يعرف حالة الرحم وحجمه. اللولب الهرموني هو نظام داخل الرحم ممكن يتشال في أي وقت والدكتور أو الممرضة هما اللي هيعملوا ده.1
لو مكنتيش ناوية تركِّبي لولب هرموني تاني ومش عايزة تحملي، استخدمي وسيلة إضافية لمنع الحمل زي الواقي الذكري لمدة ٧ أيام قبل ما تشيلي اللولب. ممكن يحصل حمل بمجرد ما طبيبك يشيل اللولب الهرموني.1
إيجابيات اللولب الهرموني
- من فوائد اللولب دة إنه بيفضل معاكي وفي مكانه لمدة من ٣-٥ سنين (حسب النوع)، لكن ممكن الدكتور يشيلهولك في أي وقت.1
- ممكن يستخدم خلال الرضاعة الطبيعية.1
- ممكن يخفف أو يقلل من ألم الدورة الشهرية الغزيرة.1
- مش بيتأثر بالأدوية التانية.1
- ممكن يكون حل مناسب لو مكنتيش عارفة تاخدي هرمون الإستروجين، واللي بيستخدم في حبوب منع الحمل (المركبة).1
- ممكن تحملي مجرد ما طبيبك يشيل اللولب الهرموني.1
- اللولب الهرموني وسيله فعاله لمنع الحمل.3
سلبيات اللولب الهرموني
- من سلبيات اللولب إنه لازم الدكتور هو اللي يركبه.1
- وارد جدًا إنه يبقى فيه عدم انتظام للدورة الشهرية ونزول قطرات دم خلال أول ست شهور من الاستخدام.3
- فيه ستات ممكن يجيلها صداع وألم وحَبْ الشباب بعد تركيب اللولب الهرموني.1
- بعض الستات بتعاني من تغيرات مزاجية.1
- من الأعراض الجانبية اللي مش شائعة للولب الهرموني: بعض الستات ممكن يظهر عندها تكيسات صغيرة بيكون جواها سوائل على سطح المبايض – وهي، عادةً، بتختفي منغير ما تحتاج لعلاج.1
- اللولب الهرموني مش بيحميكي من الأمراض المنقولة جنسيًا، عشان كدا ممكن تحتاجي تلبسي واقي أثناء ممارسة العلاقة الحميمة.1
- لو جالك عدوى أثناء تركيب اللولب الهرموني، ممكن يحصل التهاب في الحوض لو ماتعالجتش العدوى دي.1
- معظم الستات بتبطل تستخدم اللولب الهرموني بسبب النزيف والألم اللي بيكون في المهبل، على الرغم من إن ده مش شائع إنه يحصل.1
الأسئلة الشائعة
قد تكون عملية تركيب اللولب الهرموني مزعجة، بس انتي ممكن تاخدي مخدر موضعي. استشيري دكتورك قبلها. احتمال تتعرضي لتقلصات شبه تقلصات الدورة الشهرية بعد تركيبه، بس المسكنات ممكن تخفف من ألم التقلصات دي. بمجرد تركيب اللولب الهرموني، هيكون لازم الدكتور يعملك فحص بعد ٣ ل ٦ أسابيع عشان يتأكد إن كل حاجة تمام.1
اللولب هو عبارة عن جهاز بلاستيك صغير على شكل حرف "T" متغلف بالنحاس أو بمعادن تانية، بيتركب في تجويف الرحم وبتستمر فعاليته من ٥ ل ١٠ سنين.4 بيتكون اللولب الهرموني من حاجتين: جهاز بلاستيك على شكل حرف "T" وأسطوانة فيها هرمون البروجستين، واللي بيفرزه الجهاز ببطء وفعاليته بتستمر من ٣-٥ سنين علي حسب النوع. اللولب الهرموني واللولب النحاسي ليهم خصائص مختلفة، وكمان الطريقة اللي بيشتغلوا بيها بتختلف.1 استشيري دكتورك عشان تعرفي أي نوع مناسب ليكي.
اللولب الهرموني ممكن يسبب نزيف مش منتظم ونزيف مهبلي خفيف في الأشهر الستة الأولى من الاستخدام.3 الست ممكن تحس بألم لما تركب اللولب، بالإضافة لتشنج أو آلام في الظهر لمدة أيام قليلة بعد النزيف الخفيف بين الدورات اللي مش منتظمة. الأعراض دي عادةً بتختفي في خلال ٣-٦ شهور، بمجرد ما يتعود الجسم على اللولب. الأعراض دي مش بتحصل لكل الستات، كتير منهم بيستخدم اللولب الهرموني منغير مشاكل خالص.5
الدورة الشهرية بتكون أقل وأقصر وألمها أخف بالنسبة لكتير من الستات اللي ركِّبوا اللولب الهرموني وممكن الدورة الشهرية تنقطع مؤقتًا وده مش بيأثر على عملية التبويض.1
ممكن تفضلي مركبة اللولب الهرموني لمدة خمس سنين حسب نوعه. بعد كده هيكون لازم تبدليه بواحد جديد.1
أثبتت الاحصائيات والدراسات إن مفيش دليل إن فيه تغير في الوزن للستات اللي استخدمت اللولب الهرموني مقارنةً باللي بيستخدموا اللولب النحاسي. فيه كمان أدلة قليلة على زيادة في الوزن بسبب استخدام موانع الحمل اللي فيها هرمون البروجستين بس.5 وفي الدراسات دي كان متوسط الزيادة في الوزن أقل من ٢ كجم لمدة ممكن توصل لـ١٢ شهر.6
المراجع:
1-NHS. Intrauterine system (IUS). Available at: Reference Last Accessed:(12/7/2021).
2-Contraception. Hormonal IUD. Available at: Reference Last Accessed:(12/7/2021).
3-Queen's Land Health. 9 types of contraception you can use to prevent pregnancy (with pictures!). Available at: Reference Last Accessed:(12/7/2021).
4-NHS. Intrauterine device IUD. Available at: Reference Last Accessed:(12/7/2021).
5-Planet Parenthood. What are the side effects of IUDs. Available at: Reference Last Accessed:(12/7/2021).
6-Vickery Z, Madden T, Zhao Q, Secura GM, Allsworth JE, Peipert JF. Weight change at 12 months in users of three progestin-only contraceptive methods. Contraception. 2013 Oct 1;88(4):503-8.
SF0087OA727/042023
02/04/2025
PP-PF-WHC-EG-0032-1
